भाद्र २० सोमबार
पोखरा विश्वविद्यालय अनुन्धान केन्द्रले शैक्षिक अनुसन्धान र नविनतालाई सुव्यवस्थित गर्न तीन दिने कार्यशाला आयोजना शुरु गरेको छ । उक्त कार्यशाला विश्वविद्यालयका आङ्गिक, संयुक्त आङ्गिक र सम्बन्धनप्राप्त ६६ वटा महाविद्यालयहरूका रिसर्च म्यानेजमेन्ट सेल (आरएमसी) मा आबद्ध प्राध्यापकहरूका लागि लक्षित छ ।
कार्यशालालाई सम्बोधन गर्दै पोखरा विश्वविद्यालयका उपकुलपति प्रा.डा. प्रेमनारायण अर्यालयले विश्वविद्यालय अनुसन्धान गर्ने थलो भएकोले गुणस्तरीय शिक्षाका लागि पठनपाठन र अनुसन्धान सँगसँगै लैजानुपर्नेमा जोड दिए । उनले अनुसन्धानलाई व्यवस्थित गर्न विश्वविद्यालयले आफ्ना महाविद्यालयहरूमा अनुसन्धानात्मक सेलहरू गठन गर्नुका साथै यूएनडिपि लगायतका संस्थाहरूसँग साझेदारी गर्दै शिक्षक तथा विद्यार्थीहरूलाई अनुसन्धान गतिविधिमा लाग्न उत्प्रेरित हुनेमा जोड दिए । कार्यक्रममा पोलिसी रिसर्च इन्स्टिच्यूट, नेपालका कार्यकारी अध्यक्ष डा. विष्णुराज उप्रेतीले दिगो विकासका लक्ष्यहरू हासिल गर्न र देशलाई समृद्धतर्फ डो¥याउन राज्यले अनुसन्धानलाई प्रबर्धन गरेको रे बिना लगानी अनुसन्धान नहुने बताउँदै यसलाई नीति निर्माणतहबाटै कसिलो बनाउनुपर्नेमा वताए ।
कार्यक्रममा आफ्ना मन्तव्य राख्दै यूएनडिपि नेपालका आवासीय प्रतिनिधि आयशानी मेडागांगोडा लाबेले दिगो बिकासका लक्ष्यहरू हासिल गर्न यूएनडिपिले शिक्षा लगायत नेपालका विभिन्न क्षेत्रहरूमा लगानी अभिवृद्धि गर्दै आएको बताइन् । उनले पोखरा विश्वविद्यालयसँग शिक्षा, स्वास्थ्य पर्यटन, मौसम परिवर्तनका साथै सिमान्तकृत वर्गको उत्थानका लागि अझै हातेमालो गर्दै अगाडि बढ्न यूएनडिपी इच्छुक रहेको जनाकारी दिइन् ।
कार्यशालाको पहिलो दिनमा नेपालको उच्चशिक्षाको रूपान्तरणका बारेमा पोखरा विश्वविद्यालय अनुसन्धान केन्द्रका कार्यकारी निर्देशक सह–प्रा.डा. नमराज धामीले प्रस्तुतिकरण गरेका थिए । त्यसै गरी रोडम्याप फर रिसर्च एण्ड इनोभेशन इन स्टेम इन नेपालका सन्दर्भमा नेपाल एकाडेमी अफ साइन्स एण्ड टेक्नोलोजीका वरिष्ठ बैज्ञानिक डा. तिर्थ प्रसाई जोशी, प्रोमोटिङ्ग एकाडेमिक रिसर्च एण्ड इनोभेशन इन नेपालिज युनिभर्सिटीका सन्दर्भमा क्यालिटी एस्यूरेन्स एण्ड एक्रिडिएशन, यूजिसी नेपालका निर्देशक डा. ऋषिकेश पाण्डे र इथिक्स एण्ड इन्टिग्रिटी इन हेल्थ रिसर्च एण्ड इनोभेशनका सन्दर्भमा नेपाल हेल्थ रिसर्च काउन्सिल, काठमाडौंका कार्यकारी प्रमुख डा. प्रदिप ज्ञवालीले प्रस्तुति गरे ।
कार्यशालाको सञ्चालनमा पोखरा विश्वविद्यालय स्कूल अफ हेल्थ एण्ड एलाइड साइन्सेजका उपप्राध्यापक पूजा भण्डारीले गरेकी थिइन् ।

कुनै सल्लाह, सुझाव वा प्रतिकृयाको लागि nepaleditor.com@gmail.com मा इमेल पठाउन सक्नुहुन्छ ।